السلام عليكم ,,
كنت في مهمه عمل في المـنصورة لمدة 3 أيــام و فوجئت بازمه كبيرة اوي في البنزين لم اتخيلها مش عارف سببها ايه يا تري , انا مونت امبارح في ساعتين و نصف !!
قبل صلاة الفجر بقليل
عرض للطباعة
السلام عليكم ,,
كنت في مهمه عمل في المـنصورة لمدة 3 أيــام و فوجئت بازمه كبيرة اوي في البنزين لم اتخيلها مش عارف سببها ايه يا تري , انا مونت امبارح في ساعتين و نصف !!
قبل صلاة الفجر بقليل
رحمتك يارب
الغريب كان واحد بيحكى قدامى امبارح ان المنصورة مفيهاش ازمة بنزين
وكان بيستغرب من الازمة فى طنطا وبيستغرب من الشوارع المقفولة بسبب التكدس على محطات البنزين
مفيش ازاى ازمة
ده انا بقى لى اسبوع بحاول ادخل المحطة
و الله اول مرة تحصل بالشكل ده , انا برده كنت مسافر و رايح امون عادى و مش متوقع الى انا شفته خااااااااااااالص , تقريبا لاقيت نص البنزينات قافلة و يقولى مافيش بنزين , والى الاقيه يقولى مفيش 92 و طبعا بتبقى زحمة جداااااااااااا و قعدت الف كتيير لغاية ما لقيت البنزينة الى قدام شارع قناة السويس , ودخلت مونت فى حوالى ثلث ساعة .....
كان كتير قافلين و اللي كان فاتح وطنيه اللي في اول طريق بعد الاستاد كدة و دة كان طابور حوالي 70 عربيه يعني بالنظر كدة فيها مش اقل من 3 ساعات - رحت مونت عند المحطه اللي في حي المختلط - شارع الجيش - كان طابور واحد في الاول حوالي 30-40 عربيه و بعد شويه واحد دخل و اخترع طابور تاني و بقي فيه طابورين , كل طابور من 30 - 40 عربيه يعني مفركتش في الاخر . الكلام دة كان من الساعه 12 بعد منتصف الليل حتي 2 و نصف.
نسيت اقولكم ان في الاخر بعد ما وصلت لخط النهايه , طلع مفيش بنزين ولا 92 و لا 90 :))))
مفيش غير 95 :)
بس و الله العظيم شفت العجب في الطابور دة - الواحد طبعا بيحاول يتسلي في اي حاجه بقي فقعدت اتفرج علي تصرفات الناس و اكتر حاجه شديتني :
- اتنين عمالين يحششوا و مش فارقه معاهم .
- عربيه لانسر فضي فيها 4 اشخاص طلبوا دليفري لحد عندهم و كانت حركه حلوة اوي منهم .
- واحد نزل يتمشي شويه لانه زهق من قاعدة العربيه .
- واحد نزل يجيب فنجان قهوة لان قالك السهرة صباحي باين عليها.
- واحدة سنها حوالي 35-40 سنه (في منتهي الشياكه و الجمال ) و معاها ولد جمبها حوالي 15 سنه - كانت عماله تضبط المكياج بتاعها و تحط رووج تاني و كدة - قلت في بالي هو دة وقته , لكن طبعا براحتها , ديه حريه شخصيه .
- اتنين البنزين فضي منهم قبل ما يوصلوا فكل شويه لما تطلع خطوة ينزلوا و يزقوا العربيه .
- مجموعه اصدقاء بعد ما خلصوا في بنزينه اخري و نجحوا انهم يمونوا جم وقفوا جمب اصدقائهم في البنزينه ديه (منتهي الوفاء) .
- و حكايات كتيررر و كتيرررر
بس اكتر حاجه عجبتني ان مكنش فيه خناقات ولا اي مشاكل الحمد لله و الناس بالها طويل و محترمين
بورسعيد فيها ازمة بنزين برده جينا نفول امبارح مافيش غير 80 !! وفولناها الصبح انهاردة
وفى الطريق برده عند جمصة الطريق نصه واقف بسبب البنزين !
ولما جيت المحلة لقيت خناقة وطابور طويل عريض بسبب البنزين !!
راس البر فيها ازمة طاحنة البلد مفيش فيها غير بنزينتين واحدة قافلة والتانية مفيهاش بنزين والناس واقفا طابور برضو !!!!!
روحت وقفت معاهم من الساعة 10 بليل لحد الساعة 3 عربية البنزين جت فضت لممدة ساعة تقريبا لحد 4 ومن 4 لحد 6 الطابور شغال وانا كان ضوري الساعة 6 ونص كان يووم عذاب
ما هو الوقفة فى الطابور بتخلى النا س عشرة بقى زى طابور العيش كده والمهم قال لك الأزمة دى مفتعلة عشان الأخوان ميكسبوش طب اهم كسبوا مبتتحلش ليه بقى؟
طب انا دلوقتى مش عرفة حتى اجيب الطابور من اوله لفيت من عند المحافظة عشان اعرف اقف مش بيبقى باين ان دى عربيات فى الطابور ولا ركنة كل ما الف الاقى نفسى فوتته مش عرفة طب اروح امتى تبقى هادية شوية
أنا النهاردة فى طنطا وقفت فى طابور فى عز الحر الساعه 12 ظهراً
ولما الدور جه عليا ........البنزين خلص !!!!
حسبى الله ونعم الوكيل
معلش ان شاء الله تلاقى فى حتة تانية وتكون فاضية انا سمعة ان الناس بتنزل الفجر طبعا مقدرش اروح فى الموعد الغريب ده
تصدق كل المرات اللى رحتها ملقتش الطابور التانى ده بفكر اعمله انا بس خايفة حد يتنرفز عليا: )
8 الصبح ميعاد معقول يمكن الناس تبقى مستعجلة تروح شغلها ومش فاضية
وانا اصلا بنام بعد الفجر معنديش استعداد اقوم مخصوص ويجيلى احباط
انا بكره ان شاء الله ع ندى مشوار بعد المغرب اخد سندوتشاتى وتلفزيونى وارابط عند المحطة ودعواتكو بقى
البنزينة اللى عند طلخا جمب الكنيسة بيكون فيها بنزين ... يدوب تعدي شريط القطر يمين و في الغالب بلاقى فيها بنزين ... انا نزلت امبارح ادور على بنزين قعدت ادور لحد مالبنزين قرب يشطب قلت اقلل الخساير و اروح البيت
بعد ما تعدى شريط القطر فى بنزينة ؟ مخدتش بالى منها طب ووطنية اخبارها ايه
فعلا المنصورة حاجة صعبة تروح البنزينة يا اما تكون مافيهاش بنزين ياما طوابير رهيبة طب ال 80 ومتعودين انه في ازمة وال 90 ممكن شوية انما بقي المفأجأة الكبري ال 92 مش متوفر ولو اتوفر الطوابير بتبقي فيه اكتر من طوابير ال 80
مش فاهم ليه كدا والله حرام اللي بيحصل فينا ده
حسبي الله ونعم الوكيل في السبب
الوطنية بتقفل من بدرى لو هتجربى معاها روحي بدرى و لو ملقيتيش هناك كملى بقى و بصى على بنزينة المحافظة و الهابى لاند ثم طلخا المهم متنزليش ف وقت زحمة عشان متضيعيش شوية البنزين اللى حيلتك :)
البنزينة فيها 80 و 90 بس اتاكد من طابور ال 90
عموما اليومين دول انا باعدى على كالتكس رايح جاى الشغل و مفيش اساسا بنزين بينزلها واضح اننا هنتجه ل 95 او تاكسيات .. المصيبة ان معظم سواقين التاكسي فى المنصورة عايزين ضرب النار و استغلاليين و الواحد مش ناقص خناقات وهو رايح وجاى م الشغل ده انا اقلب العربية غاز ارحم لى
طنطا اليوم
والدى النهاردة فى حدود 5.5 صباحاً
نزل علشان البنزين
وقف تالت واحد فى الطابور
والبنزينة مفيهاش بنزين ومنتظرين العربية الكبيرة اللى بتملى الخزان
قالوا بتيجى فى حدود 7.5 صباحاً
فضل منتظر من 5.5 الى 10.5 ومفيش فايده مفيش بنزين وصل
وسلك الدبرياج اتقطع منه فبعت للميكانيكى جه خد العربية بدون ما يحط بنزين
أنا امبارح الساعه 12 ظهرا كنت واقف فى نفس البنزينة ولما جه على الدور البنزين خلص
ماشى بظروفها الساعه 11 ظهرا النهاردة لاقيت بنزينة أنا عارفها سيئة السمعة فى احدى القرى
ولاقيت يادوب 3 عربيات واقفين
قولت يالا بقى
ليس على المضطر حرج وحطيت بنزين 80 فى 10 دقائق
والحمد لله
اتصلت بوالدى قولتله تعالى بسرعه على البنزينة ديه وفعلا جه بعدى على طول
وحط بنزين بعد أكثر من 6 ساعات عناء علشان البنزين
من الساعه 5.5 فجرا الى الساعه 12 ظهراً
يا نايل موتورزاويه
الازمه عندنا في سوهاج بقالها اسبوع والواحد ممكن يقف طابور طويل بالساعتين وعقبال ما يوصل للطرمبه تكون خلصت بنزين
ومعانا ربنا ان شاء الله
على فكرة يا جماعه المنصورة مكانتش بتبقى المنظر ده قبل كده خاالص غير فيين و فيين
كان اخرى تلت ساعه و امون الا اليومين دول
الطابور كان بدايته اول امبارح عند شركة الكهرباء لحد البنزينة الى عند مسجد النصر
ربنا يسهل انا هعمل بيات شتوى اليومين دول على ما الدنيا تضبط
الحمد لله معايا بنزين كنت جايبة من على طريق دمياط :)
ادينى رحت وعلى ما وصلت مكانش فى غير 95 عشان التانيين يتغاظوا هههههههه
انا وقفت يا جماعة من 7.30 تقريبا وخدت ساعة من السى اى بى لحد اشرف عرفان !!!
انا مش فهمة العربيات مبتتحركش ليه يمكن عشان كان البنزين خلصان بقى والطرمبة بتاعة 95 بس اللى شغالة
المهم ناس بتقدم شاى وقهوة وبتوع الورد معديين ولا ما نكون فى نزهة
وانا بعد الساعةة الأولانية كنت حسة ان اللى هيكلمنى هفجره ورد ايه يا بنى فى الوقفة السودة اللى احنا وقفينها دى
واللى زاد وفاض ناس بتحاول تدخل من نص الطابور مكنتش همانع لو حد فجرهم برضه طبعا يحاولوا وكلنا بنجرى بسرعة نقفل اى ثغرات عشان ميعرفوش يخشوا فييأٍوا ويمشوا
وناس بقى تقوللك عدينى عشان اركن جوه اعديك مين يا بنى انا فى الحاجات دى عندى سؤ ظن: ) افرض عديتك وطلعت بتضحك عليا ووقفت
كده اعراض الهلوسة ظهرت بعد ساعتين الا ربع ودخلنا على بارانويا: )
المهم كام عربية جم وحاولوا يعملوا طابور تانى كنا قربنا بقى من البنزينة
جه الضابط وقاللهم مفيش طابور تانى ارجعوا ورا الصراحة كنت عيزة اشكره
يعنى ا نتو جايين بعد ما وقفنا ساعتين وعايزين تدخلوا فى ثانية تهريج طبعا
المهم جت الأخبار ان مفيش غير 95 وانا قعدة ادعى اى حد يزهق ويمشى مفيش امل
واحد اختارنى كده من وسط العربيات مش عرفة ليه وقاللى على ما توصلى هيكون البنزين خلص
قلت له اعمل ايه يعنى
قال معايا بنزين 90 تاخدى؟
مرضيتش لأن اساسا مبحطش 90 وايه يضمنلى ان ده بنزين 90 اصلا ولا بنزين من اساسه
واخيرا اشهد ان لا اله الا الله دخلت فلقيت اللى قدام بيقولوله 10 لتر قلت ايه ده هم محددين كمية معينة عشان قرب يخلص ولا ايه
طلع هو اللى عايز كده
وفولت وادانى الباقى غلط بزيادة فبرجعهوله قام اللى و ارايا مزعق يعنى مستحمل ساعتين ونص والثانية اللى برجع فيها للراجل حقه اللى ضايقتك سبحان الله
طبعا العامل عمل الصح معاه وزعق له وقال له انا اللى كنت هتحمل العجز ده من مرتبى
وواحد دلوقتى فى التلفزيون بيقول ايام مبارك عمرى ما وقفت بالساعات عشان احط بنزين هو شايفنى وانا بكتب الشكوى ولا ايه: )
ودى كانت رحلتى لبلاد ---قصدى لمحطة البنزين وكل عام انتم بخير!!
انا برضه كنت فى زياره هناك الاسبوع الماضى و كانت ازمه البنزين طاحنه
وما زالت الأزمة مستمرة مافيش حد هنا عنده تفسير
انا نزلت انا و ابن عمي اول يوم رمضان بعد الفجر و نزلنا نلف على بنزين 90 - 92 طبعاً بنزينه المحافظه كانت مقفوله وميت حدر مقفوله اللي على الطريق السريع ناحيه ساميه الجمل مقفوله كل بنزينات سوق الجملة مقفوله
فكنا معديين عند المحافظة لقينا البنزينة شغاله و مفيش غير 3 عربيات بس ههههههه :B4_611:
طلع مفيش غير بنزين 80 قلت يلااااااااااااااا اهو كله بنزين والسلام :))
والحمد لله تم تفويل العربية . :Copy of new: